sábado, 23 de octubre de 2010

Camiño Primitivo na Ulloa (11): A igrexa de San Salvador de Merlán

O Camiño primitivo pasa xusto por diante da igrexa de Merlán (foto 1) pero, pola excesiva altura dos nichos do camposanto que o rodea, a fachada non se ve dende o Camiño. A igrexa era románica na súa orixe, de finais do século XII, pero foi reformada no século XVI. Nesta reforma perdeu a súa fachada orixinal e parte das paredes laterais, e foille engadido o pórtico. Na reconstrución da fachada foron reempregadas pezas da estrutura románica, un exemplo diso son os perpiaños con bolas que a adornan (foto 2) ou algunhas das columnas do pórtico que comparten espazo coa pía bautismal románica (foto 3). Do edificio, chama a atención a decoración do lintel da porta lateral (fotos 4). Segundo Jaime Delgado a “cruz feita con entrelazos” representaría simbolicamente a Cristo flanqueado por dúas pequenas árbores “evocadoras tradicionais de ambientes paradisíacos”, e dicir, a árbore da vida. Como remate, vale a pena ollar a ábsida cadrada que coroa a igrexa (foto 5, 6 e 7) que conserva os seus canzorros e unha fermosa fiestra. Detalles do exterior da igrexa. Km. 70,021 Parroquia de Merlán. Palas de Rei.

2 comentarios:

Paulapalas dijo...

Hola bos días, de antemán, é verdade hai que ser de fora para ver as cousas. Nunca me fixara que na casa Santalla,eran o mesmo arbore que o da nosa igrexa. Estou lendo o teu blog e encantame. A verdade non so disto, se non de máis cousas de Palas de Rei que non sabia. Voulle mandar ahora un correo con fotos.

A Ulloa en fotos dijo...

Ola Paula.

Moitas grazas polo teu comentario. Teño totalmente abandonado este blog, por iso non vin o teu comentario ata agora.
Non me chegaron as fotos das que falas, se queres volver mandalas...

Aperta.